विराटनगर । नेकपा एमाले र नेपाली कांग्रेसबिचको गठबन्धन भत्किएर बनेको एमाले–नेकपा गठबन्धनमा कोशी प्रदेश सरकारको नेतृत्व एमालेले गर्ने सहमति छ । तर, एमालेभित्रैको विवादले भने उक्त सहमतिअनुसार को मुख्यमन्त्री बन्ने भन्ने विवाद चर्किएको छ ।
एमालेका केन्द्रीय सचिव समेत रहेका वर्तमान मुख्यमन्त्री हिक्मतकुमार कार्कीलाई नै निरन्तरता दिनुपर्ने कतिपय सांसदहरू बताउँछन् । पार्टी अध्यक्ष केपी शर्मा ओलीसँग उनको सम्बन्ध विग्रिएको भन्दै कतिपय सांसदहरू भने उनको विकल्प खोज्नुपर्नेमा छन् । ‘अब उहाँको विकल्प खोज्नुपर्छ,’ एमाले कोशीका एक सांसदले भने, ‘उहाँले अध्यक्षले भनेको नमान्ने कुरै आउँदैन । यो पार्टी सिस्टम हो ।’
