काठमाडौँ । सत्तारूढ दल नेकपा माओवादी केन्द्रको जारी स्थायी समिति बैठकमा कांग्रेस महासमिति बैठकले गरेको निर्णय, सुदूरपश्चिम प्रदेशमा माओवादीभित्र देखिएको विवाद र राष्ट्रियसभा अध्यक्ष सम्बन्धमा गम्भीर छलफल भएको छ ।
मंगलबार बिहान केन्द्रीय कार्यालय पेरिसडाँडामा बसेको बैठकमा यी तीन विषयलाई प्राथमिकता दिइएको हो । तर निष्कर्ष नआउँदा बैठक बुधबार बिहानसम्मका लागि स्थगित भएको छ ।
बैठकमा राष्ट्रिय राजनीतिको विषयमा गम्भीर छलफल भएको प्रवक्ता अग्निप्रसाद सापकोटाले जानकारी दिए । उनले विशेषगरी राष्ट्रियसभा अध्यक्ष माओवादीले छोड्न नहुने अधिकांशको सुझाव आएको बताए ।
भर्खरै सम्पन्न नेपाली कांग्रेसको महासमिति बैठकमा भएको छलफल र पारित गरेका विषयका बारेमा पनि छलफल भएको उनले जानकारी दिए ।
‘अध्यक्षले बैठकमा खासै कुरा राख्नुभएन । अब उहाँले बुधबार आफ्ना कुरा राख्नुहुन्छ होला,’ प्रवक्ता सापकोटाले भने ।
कांग्रेसको महासमिति बैठकमा महामन्त्री गगन थापाले पेस गरेको प्रतिवेदनमा आगामी चुनावअघि गठबन्धन नगर्ने उल्लेख थियो ।
यसैगरी एक हजार एकसय ३१ जना महासमिति सदस्यले कांग्रेस हिन्दु राष्ट्रको पक्षमा उभिनुपर्ने सुझाव दिएका थिए । कांग्रेस उपसभापति एवं रक्षामन्त्री पूर्णबहादुर खड्काले पेस गरेको राजनीतिक प्रतिवेदनमा माओवादी जनयुद्धका कारण देश पछि परेको निष्कर्ष निकालिएको थियो । यद्यपि महासमितिले गरेको निर्णय परिमार्जनसहित केन्द्रीय समितिले अनुमोदन गर्ने निर्णय कांग्रेसले गरेको छ । महासमिति बैठकमा उठेका प्रश्न र निर्णयका कारण कांग्रेससँग माओवादी सशंकित देखिएको छ ।
यसअघि राष्ट्रिय सभागृहमा केन्द्रीय समिति बैठकलाई सम्बोधन गर्दै माओवादी केन्द्रका अध्यक्ष पुष्पकमल दाहाल ‘प्रचण्ड’ले कांग्रेससँगको गठबन्धन फलदायी नभएको निष्कर्ष निकालेका थिए । प्रचण्डको अभिव्यक्तिले कांग्रेसभित्र तरङ्ग नै ल्याएको थियो ।
श्रोत:रातोपाटी
