बाजुरा, १ वैशाखः जिल्लाको पूर्वी उत्तरी भेगको बूढीनन्दा नगरपालिका–२ कोल्टीमा आज इलाका प्रशासन कार्यालय स्थापना गरिएको छ । कार्यालय स्थापना भएसँगै यहाँका चार पालिकाका नागरिकले राज्यबाट प्रवाह हुने सेवा लिनका लागि पाँच घण्टा लगाएर मार्तडीमा धाउनुपर्ने बाध्यता हटेको छ ।
प्रमुख जिल्ला अधिकारी डोरेन्द्र निरौलाका अनुसार गृह मन्त्रालयको परिपत्रअनुसार कोल्टीमा इलाका प्रशासन कार्यालयको निर्णयबमोजिम कार्यालय स्थापना गरी सञ्चालन गर्न निर्देशनपछि आज औपचारिक रूपमा उद्घाटन गरिएको हो । इलाका प्रशासन कार्यालयको भवन निर्माणको लागि जग्गा खरिदको प्रक्रिया अघि बढेर आवश्यक बजेटको व्यवस्था गरिएको प्रमुख जिल्ला अधिकारी निरौलाले बताउनुभयो ।
नागरिकता, राहदानी, मालपोत र नापीको कामका लागि सदरमुकाम धाउनुपर्ने अवस्थालाई मध्यनजर गर्दै सरकार नौ जिल्लामा इलाका प्रशासन कार्यालय बनाउने निर्णय गरेको थियो ।
पूर्वी उत्तरी भेगका हिमाली, स्वामीकार्तिक खापर, जनन्नाथ गाउँपालिका र बूढीनन्दा नगरपालिकाका नागरिकले राज्यबाट पाउने सेवा सुविधा लिन १० हजार खर्च गरेर सेवा लिनुपर्ने अवस्था रहेको थियो । यहाँका स्थानीय तह, राजनितिक दल र प्रशासनसहितको नागरिकको मागअनुसार सरकारले चार पालिकाका नागरिकले मार्तडी धाउनुपर्ने बाध्यता टरेको छ ।
वैशाख १ गते बिदाको दिन कार्यालय उद्घाटन गरिएको भए पनि बुधबारदेखि भने नियमित रूपमा सेवा सञ्चालन गरिने प्रमुख जिल्ला अधिकारी निरौलाले जानकारी दिनुभयो । मालपोत र नापी कार्यालयले पनि जग्गा नक्सा पास र मालपोतले जग्ना नामसारीलगातय कार्यको सेवा दिनेगरी स्थापना गरिएको जिल्ला प्रशासन कार्यालयले जनाएको छ ।
R.S.S
