बुलिङटार । नवलपरासी पूर्व सुगम जिल्लामा गनिन्छ । तर सुन्दा अचम्म लाग्न सक्छ, यही सुगम जिल्ला भित्र पनि थुप्रै दुर्गम ठाउँहरु छन्, जहाँ अहिलेसम्म बिजुली बत्ति पुगेको छैन । त्यहाँका जनता अझै पनि टुकी मुनि रात काटाउन बाध्य छन् । यही मध्येको एक हो( पूर्वी नवलपरासीको बुलिङटार गाउँपालिका ।
यहाँ राष्ट्रिय प्रशारण लाइन जोडिएको छैन । केही व्यक्तिले सोलार जडान गरेका छन् भने वडा नम्बर १, ३ लगायत स्थानमा लघुवित्तको विजुली (बिहान र बेलुका मात्र) बलेको छ । बाँकी माथिल्लो भागमा टुकी बाल्नु परेको बुलिङटारका स्थानीय शिक्षक लोकप्रसाद रामदामले बताए ।
बुलिङटार वडा नम्बर २ का अध्यक्ष कमलराज बकावल मगरले पनि बिजुली नपुगेको सत्य भएको बताए । उनका अनुसार हुनेखानेहरुले सोलार जडान गरेका छन् । अन्य व्यक्तिहरु बिजुलीको पर्खाइमा रहेको बताए ।
वडाअध्यक्ष मगरका अनुसार बिजुलीको समस्या माथिल्लो भेगमा भन्दा पनि करिडोरको बाटोले छोएको तल्लो भेगमा बढी छ । माथिल्ले भेगमा सुन्तला, अदुवा, टिमुर, आलु आदीबाट आम्दानीको राम्रो श्रोत भएपनि तल्लो भेगमा आम्दानीको श्रोत पनि नहुँदा स्थानीय बढी समस्यामा रहेको उनको भनाइ छ ।
यो क्षेत्रबाट प्रतिनिधिसभा सदस्यमा नेपाली कांग्रेसका नेता डा.शशांक कोइराला लगातार चार पटक सम्म निर्वाचित भए । प्रभावशाली नेताको छवि बनाएका नेता कोइरालाको हरेक पार्टीका केन्द्रीय स्तरका नेतासँगको सम्बन्ध र उठबस पनि राम्रै छ ।
कोइरालाले हरेक चुनावमा राष्ट्रिय प्रशारण लाइनको मुद्धा उठाउने प्रतिवद्धता व्यक्त गर्दै चुनाव जित्ने गरेको स्थानीय शिक्षक लोकप्रसाद रामदामको भनाइ छ । तर चुनाव जितेपछि चुनावका बेला उठाएका बाचा पनि बिर्सने प्रवृति नेता कोइरालामा पनि देखियो ।
श्रोत : रातोपाटी
